Heklev Podkast

PRIZIOÙ 2026

Anna — 2026-02-17T12:32:52Z

Tourmant sevenet gant Mai Lincoln ha Thomas Cloarec a zo anvet e rummad an oberennoù Kleweled ✨🥂!

E Trebeurden, e Bro-Dreger, war Aod ar Vein Ruz, e vo kinniget 29vet lid ar Prizioù, prizioù dazont ar brezhoneg, er bloaz-mañ. Kenaozet eo an darvoud-mañ gant ar chadenn skinwel rannvroel ICI Breizh hag Ofis Publik ar Brezhoneg. Garedonet e vo ar gwellañ taolioù-intrudu ha krouidigezhioù brezhoneg ar bloaz tremenet e meur a rummad. Tud, kevredigezhioù, embregerezhioù, ensavadurioù, hag oberennoù skrivet, filmet ha kanet a vo enoret ar bloaz-mañ c'hoazh e-pad ul lid meur a vo dalc'het d'ar 24 a viz Meurzh diouzh noz.

Heklev podkast er festival Longueurs d'ondes !

Anna — 2026-01-22T15:37:07Z

D'ar gwener 30 a viz Genver e vo degemeret skipailh Heklev Podkast gant ar festival Longueurs d'ondes evit un daol-grenn war ar ar c'hrouiñ podkastoù e brezhoneg.
Un anv a zere a zo bet kavet ganeomp evit an emgav-mañ : Heklev podkast, le laboratoire bouillonnant de la création bretonne !

Un dro gaer evit lakaat war-wel al labour boulc'het abaoe krouidigezh ar gevredigezh ha da blantañ un tamm brezhoneg er c'hwartz war un dro.
Emgav er sal 8 neuze, da 3e.

Muioc'h a ditouroù : Longueurs d'ondes.

2025-2026 : Skipailh HEKLEV zo en em vodet evit prientiñ ar raktresoù o tont

Thomas — 2025-08-21T14:22:45Z

Skipailh HEKLEV zo en em vodet e Douarnenez da vare Gouel ar filmoù a-benn labourat war raktresoù nevez evit ar gevredigezh.

TOURMANT - Un heuliad faltazi da zizoloiñ en diskar-amzer 2025

Thomas — 2025-04-18T16:19:47Z

Distro eo skipailh Heklev Podkast goude div sizhunvezh fromus ha stank war enez Eusa, o krouiñ hag enrollañ an heuliad radio TOURMANT.

Duhont eo bet bodet 16 arzour, a-benn sevel an heuliad dibar-mañ, a vo klevet war ar wagennoù adalek an diskar-amzer 2025. Mall 'zo warnomp e vefe dizoloet ar Radio drama-mañ gant ar selaouerien!

TOURMANT, un heuliad radio produet gant KALANNA hag HEKLEV PODKAST
Trugarez vras d'an TEATR PIBA, da zDIZALE, da gKEMMESK ha d'an ESKAL !

Ar skipailh : Yann-Herle Gourves, Mai hag Anna Lincoln, Thomas Cloarec, Gwenole Peaudecerf, Jean-Mari Ollivier, Christophe Le Menn, Marion Gwen, Yann Le Corre, Anaïs Leroux, Quentin ha Justine Morvan, Gwenola Coic, Manon Le Gourrierec, Loeiza Beauvir, Gwendal Le Goff.

Heklev Podkast e Longueurs d'Ondes

Gwenole — 2025-01-31T15:06:17Z

Da geñver ar Festival Longueurs d'Ondes ez eo en em vodet skipailh Heklev Podkast a-benn kenderc'hel da gas raktresoù war-raok !

Ar blijadur hon eus ivez da ginnig deoc'h un toullad istorioù nevez er rummad Chuchumuchu ha pevar levr da glevet embannet gant Timilenn.

Istorioù nevez 'zo enlinenn !

Gwenole — 2024-12-16T19:10:55Z

Pevar istor nevez er stirad Chuchumuchu ha c'hwec'h all er stirad E pleg ma skouarn a zo bet lakaet enlinenn nevez-zo ! Peadra da lakaat kozh ha yaouank da ziduiñ e-pad vakañsoù Nedeleg.

CHUCHUMUCHU

Steredenn an huñvreoù kollet
Troioù-kaer liesliv Gwaregig ar Glav
Nina ha pako
Kazhus ha kazhig

E PLEG MA SKOUARN

Per al loufer
An den kozh diwelus
Al lapin e foñs an tog
Itron onion ha sir sardin
Avel fur ha foll
Ar vezh lonk

Kleor, an audiobook e brezhoneg !

Anna — 2024-09-02T14:56:01Z

Setu erru Kleor, al levr da glevet e brezhoneg ! Divizet o deus Mael Thépaut ha Perynn Bleunven, mignoned a gozh, ijinañ an danvez a vanke dezho : un audiobook e brezhoneg. Ar Vastardez eo ar romant kentañ o deus dibabet enrollañ, skrivet gant Yann-Vadezour Lagadeg. Ennañ ec'h heulier Ivona, plac'h en un tiegezh e Sant-Nenven, parrez a vro Leon. Desevel he merc'h a rank ober e diavez ar stad a briedelezh. Nag a drouz er c'hontre, dindan yev an Iliz hag an teodoù fall ! Ur gontadenn saourus, a drugarez da vrezhoneg dibistik an Aotrou Lagadeg ha da vouezh flour hol lennerez, Gwenn an Dreo.
A boan kroget gant ar selaouadenn, ne vezoc'h ket gouest da ziskrogiñ, sur ha n'eo ket marteze !

E-touez loreidi Prizioù Dazont ar brezhoneg 2024 emañ HEKLEV PODKAST!

Thomas — 2024-03-08T17:58:39Z

Aozet e vez bep bloaz Prizioù Dazont ar Brezhoneg gant an Ofis Publik ha Frañs 3. Ar pal eo lakaat oberoù nevez a dalvez da skouer evit an holl. Arc'hantaouet eo ar Prizoù gant Kuzul-rannvro Breizh. Lorc'h a zo ennomp o vezañ anvet e-touez loreidi Prizioù Dazont ar brezhoneg 2024, er rummad Kevredigezhioù ar bloaz!

France 3 Breizh, Rannvro Breizh hag Ofis Publik ar Brezhoneg a ro emgav deoc'h evit 27vet lid ar Prizioù, prizioù dazont ar brezhoneg. Gant an abadenn nevez-mañ, hag a vo kinniget gant Goulwena an Henaff ha Yann-Herle Gourves, e vo priziet en-dro obererezhioù gwellañ ar bloaz: Brezhoneger.ez ar bloaz, kevredigezh, intrudu gwellañ er bed ekonomikel, strollegezh tiriadel / diazezadur publik, levr gwellañ e brezhoneg, gwellañ sevenidigezh kleweled, gwellañ krouidigezh kanet e brezhoneg.

Kaset e vo an nozvezh vras-se en-dro gant ur sonadeg eus Quinquis.

D'ar Yaou 14 a viz Meurzh da 10e45 noz war France 3 Breizh ha france.tv

Levrioù nevez a zo bet embannet gant Timilenn !

Thomas — 2023-12-12T17:16:28Z

Ar gevredigezh Timilenn a zo bet krouet e Sant-Ervlan (Bro-Naoned) e 2019 evit embann levrioù e brezhoneg.

Pal ar gevredigezh a zo reiñ c'hoant da lenn d'an holl vugale, koulz reoù diaesterioù lenn ganto (disleksiezh da skouer) pe get : moullet e vez al levrioù war baper nann-lufrus, ar skritur dibabet a zo aes ha bras a-walc'h, kement skeudenn a glot gant an destenn, etrelinennoù bras a zo…

Dibab a ra Timilenn levrioù un tamm divoutin, ha pa vefe dre an temoù kinniget pe dre an tresadennoù kaer, evit kaout plijadur ha gellout eskemm e brezhoneg diwar-benn sujedoù a bep seurt er familhoù, er skol hag e lec'hioù all.

FARAH A ZO SOT GANT MANGEZ gant Sarthak Sinha
Farah a zo sot gant mangez ! Bep hañv e plij dezhi kutuilh ar frouezh azv eus gwezenn-vangez he zad-kozh. Ar bloaz-mañ eo goullo ar wezenn ! Neuze e tiviz Farah e rank sikour ar wezenn da lakaat he frouezh muiañ-karet da greskiñ. Ha kompren a raio Farah ez eus muioc'h en ur wezenn-vangez eget ar frouezh a zoug ?

CHWEZIGELLOÙ AN EÑVOR gant Jessie Oliveros ha Dana Wulfekotte
Meur a c'hwezigell en deus Aorelian, ma talc'h e eñvorennoù enno. Tad-kozh en deus ur bern c'hwezigelloù. E pep c'hwezigell ez eus dalc'het unan eus e istorioù dreistordinal : hini e eured war ar maez pe hini un devezh pesketa frouezhus-tre. Met un deiz en deus lezet Tad-kozh ur c'hwezigell da nijal kuit. Klask a ra Aorelian tapout anezhi. Met ne c'hell ket. Koll a ra Tad-kozh ur c'hwezigell all. Hag unan all c'hoazh…

El levrioù e vo tu deoc'h kavout ur c'hod QR da skanniñ gant ho pellgomzer hezoug evit selaou ouzh an istorioù.

Enrolladenn produet gant Kalanna gant sikour Rannvro Breizh.

Evit prenañ al levrioù dibar-mañ, kit d'ober un tamm tro war lec'hienn ar gevredigezh, pe en ho levrdi muiañ-karet.

ROUD DIROUD - Distro d'an dazont

Thomas — 2023-12-12T17:03:11Z

Roud Diroud a zo ur raktres krouiñ c'hoariva kaset dindan berr amzer gant Mona Caroff evit ur strollad komedianezed ha komedianed amatourien brezhoneger. Un devezh labour a vo bep miz etre Miz Genver ha Miz Mae. Un disoc'h a vo kinniget e Ti ar C'hoariva, e Brest, da vare darvoud « The International Week », douget gant an Teatr Piba etre ar 14 hag an 18 a viz Mae, asambles gant ar raktres europat PHŌNĒ.

Ur raktres kinniget gant Mona Caroff hag an Teatr Piba

Ouzhpenn lavar un destenn a zo ezhomm evit c'hoari. Bezañ amañ, bremañ, gant va c'horf, va mouezh. Selaou ouzh ar re all, ha chom kizidig ouzh an endro. Labouret e vo war an holl draoù-se evit kas da benn Roud Diroud. Kavout un tu da zanevellañ un destenn tost deus un testeni a vo ivez war hent al labour.

« Roud Diroud a welan evel un arnod, ur furcherezh c'hoariva a-stroll, gant hent an treuzkas e-giz sujed enklask. Petra viran deus ar berniad traoù a zeskan bemdez, er skol, gant ar gevredigezh, an dud, an natur? Perak e talc'han soñj deus un dra bennak na vo ket talvoudus d'am amezog? Peseurt lodenn deus va fersonelezh a zeu diwar pezh ‘zo bet treuskaset din? Hag e c'hellfen reiñ trowardroioù ar pezh a zo bet treuskaset din? Ha reoù ar roudoù a lezin-me war va lerc'h?
Hol labour a glasko marteze respont da goulennoù ‘zo, oc'h ouzhpennañ lod all moarvat, ar pezh a roio un destenn. Honnezh a vo skrivet ganin diwar an danvez skrivañ, korfel, ar skiant-prenet hag ar c'hizidigezh degaset gant ar strollad tud a gemero perzh »

Mona Caroff

Pegoulz ?
E Miz Genver, un dibenn-sizhun evit mont e darempred:
Sadorn 6, etre 2e ha 6e
Sul 7, etre 11e ha 6e

Miz C'hwevrer
Sul 18, etre 11e ha 6e

Miz Meurzh
Sadorn 23 pe Sul 24 (hervez al lec'h), etre 11e ha 6e

Miz Ebrel
Sadorn 13, etre 11e ha 6e

Miz Mae
Lun 13, 6e - 8e noz
Meurzh 14, 6e - 8e noz
Merc'her 15, 6e - 8e noz
Yaou 16 : ABADENN KINNIG

Evit kemer-perzh er raktres-mañ, pe m'ho peus ur goulenn, kasit anezhi dre vail : caroff.mona@hotmail.fr pe teatr.piba@gmail.com

Soutennet eo ar raktres Roud diroud gant Unvaniezh Europa

Foto : Hentou Gwenn - Nos voies lactées 2023 @Alain Monot